Rev. Ram Kumar Sewak Ji
Rev. Ram Kumar Sewak Ji

Aaupcharikta se Anaupcharikta ki aur

Writer : Rev. Ram Kumar Sewak Ji

E-mail : ramkumarsewak@maanavta.com

 

Sansar mein maanav-maanav ka vyavhar len-den (Give & Take) ke siddhant par aadharit hai. Koi hamen kuchh deta hai, ham kisi ko kuchh dete hain. Swarthsiddhi ka yah bhav hamen ek-doosre ke najdeek lata hai aur hamare sambandh nirmit hote hain.

 

Us sambandh ki aadharshila choonki len-den par tiki hai isliye jab tak ichhanuroop milta rehta hai, hamare sambandh chalte rehte hain, jaise hi len-den ka anupat garhbadata hai, sambandh bhi hilne lagte hain aur antatt: toot jaate hain.

 

Vartman yug arth pradhan hai. Doosre shabdon mein kahen to yah dhan pradhan yug hai. Maanav ke len-den ki kshmta uski aarthik sampannta ke aadhar par aanki jati hai. Yahi kaaran hai ki jo sadhansampann hai, uske sampark sootra door tak phaile hote hain jab ki jo vipann hai vah namak-tel-lakdi ke prabandh mein hi juta rehta hai. Uske sampark pray: ban hi nahin paate, ban bhi jaate hain to chal nahin paate.

 

Aashcharya ki baat to yah hai ki khule taur par koi len-den ki baat nahin karta. Janamdin, vivah, sagaee aadi ke jitne bhi nimantran prapt hote hain unme likha hota hai darshan dekar aashirwad pradan karen lekin yadi koi atithi vahan se sirf aashirwad hi dekar laut aaye to use moorkh samjha jayega aur bhavishya mein use nimantra diye jaane ki sambhavna samapt ho jayegi.

 

Kuchh varsh pehle mujhe ek vivah ka nimantran mila tha. Nimantran ke anusaar mein apni patni ko sath lekar vahan pahuncha aur yathasambhav parampara nibhate huye sabhya vyvhaar kiya. Parampara k anusaar ek niyat dhanraashi ka lifafa bhi mejbaan ko bhent kiya parantu jab unhone apne doosre bachche ka vivah kiya to mujhe nimantran nahin diya. Iska kaaran mujhe yahi laga ki lifafe mein rakhi dhanrashi sambhavt unki aasha ke anuroop nahin rahi hogi athva unhone meri aarthik haisiyat, asliyat se jyada aank li hogi, baharhaal un sajjan ne mujhe jivan ka ek naya sabak de diya.

 

Is ghatnakram se mujhe yahi sabak mila ki nimantran vyakti ke liye nahin balki uski samrthya ke liye hai. Nimantran patra mein jo aashirwad dene ki prathna ki gayi hai, vah kewal aupcharikta hai. Vaastvikta to yah hai ki mejbaan chahta hai ki aap bhari-bharkam lifafa use bhent karen.

 

Aashirwad sambandhi jo bhasha hai, vah to vaisi hi hai jaise chhohe ko pakadne ke liye ham log pray: choohedani mein roti ka tukda laga dete hain. Oopri taur se dekhne par lagta hai ki ham chhohe ke pet bharne ka prabandh kar rahe hain jab ki mool bhav choohe ko phansakar use ghar se baahar phenk dena hai.

 

Sansar ki poori saranchna aaj aupcharikta ki aadharshila par tiki hui hai.

 

Pichhle dino mere ek mitra ne ane grah pravesh k silsile mein nimantran ki kripa ki. Maine patni ko bataya to unhone bataya ki jab hamare grah pravesh ka samaroh hua tha to unhone kuchh uphar hamen bhent kiya tha. Mujhe bhi baat yaad aa gayi aur paramparanusar main us uphar se mahanga ek uphar lekar unke karyakram mein pahuncha. Unhone muskurakar kaha - “are, iski kya jaroorat thi.” Lekin mujhe lag gaya ki asli jaroorat to isi ki thi. Samaaj mein ab mera shumar bhi samajhdaron mein hone ki sambhavna prabal ho gayi hai.

 

Aam-taur se mujhe aise vaatavaran mein bahut ghutan hoti hai lekin parampara ke anusar vah ghutan ab hamare samajik jivan ka hissa ban gayi hai. Ghutan aur jivan dono sath-sath chalte rehte hain.

 

Gehraee se dekhen to kuchh kaam ham aupchariktavash karte hain, jaise pray: kisi vyakti se milne par ham kehte hain ki aapse milkar bahut khushi hui, halanki kaee baar kisi se milkar bilkul hi khushi nahin hoti balki koi-koi to aisa namurad hota hai ki milkar afsos hota hai. Andar se vichar aata hai ki na milta to badiya rehte. Aisi jaankari de gaya ki man dukh ke saagar mein doobta-tairta rahega.

 

Magar majboori hai ki kehte yahi hain ki aapse milkar bahut khushi hui.

 

Aupcharikta aur anaupcharikta ka yah jo phaasla hai, ise paatne ke liye jhooth ko beech mein laana padta hai. Jhooth beech mein aa jata hai to sahajta khatm ho jaati hai.

 

Duniya ke 90- pratishat karya aaj aupchariktavash ho rahe hain. Neta ji jan sewa ke lambe-chaude bhaashan aupchariktavash de rahe hain. Babu tebal ke oopar se to kehta hai main rishwatkhor nahin hoon lekin neeche se rishwat pakad leta hai. Uska sanvya ko rishwatkhor na maan-na aupcharikta matra hai. Aur to aur muskaan bhi aupcharik hokar reh gayi hai. Air hostes nirantar har kisi ko dekhkar muskurati hai, lekin yah uski duty ka hissa hai, uski muskaan apne vetan (salary) ke liye hai, anya kisi ke liye nahin.

 

Air hostes ki muskaan ki bhaanti ham subah se sham tak muskan ka aadaan-pradaan karte rehte hain aur jivan ghisat-ta rehta hai. Lekin kuchh karya aise hote hain, jinme aupcharikta ki gunjaeesh hi nahin hai, jaise- bhojan karna, neend lena, nitya kriyayon ka nirvaahan. Is prakar ke karyon mein to asliyat hi haavi rakhni padti hai.

 

Bhojan ham kisi ko dikhane k liye nahin karte. Ham kisi ko dikhane k liye neend nahin lete. Neend jab aati hai to pathron par bhi insan so jata hai. Shauch aadi nitya kriyaon ka nirvaahan bhi ham kisi aupcharitavash nahin karte balki bheetar kar dabaav padta hai to har kisi ko bhagna padta hai. Majdoor ho chahe udyogpati, is maamle mein sab barabar hain.

 

Ham palken jhapkate hain, saans lete hain, ye karya savbhavik ho rahe hain, inme koi aupcharikta nahin hai.

 

Duniya ka har karya yadi aisi hi sahajta se hona shuru ho jaye to phir anand kahin door nahin hai. Na kisi teerath ki aavshyakta hai, na sanaan ki. Na pooja-paath aadi kisi karm kaand ki aavshyakta hai, na hi samadhi aadi lagane ki. Aavshyakta naklipan ke sthan par vaastvikta ko rakhne ki hai. Aupcharikta ki bajay Anaupcharikta ko mahatta dene ki hai. Har koi jitni jaldi is karya ko kar lega, vah utna hi jaldi sahaj jivan jee paane mein saksham hoga.

Comments: 10
  • #10

    murli dhar mishra (Wednesday, 22 July 2015 07:46)

    es lekh ko likhkr aapne kripa hajaro lakho padhane walo pr kiya hai amrit pan karakr eske liye dhanyvad subd adi bahut hi tuchch lagane lage hai mai to aap ke vicharo ko padhkr gadgad ho gaya mahraj ji aap to sachmuch pujyniy hai koto2 dandwat

  • #9

    nishu (Saturday, 21 December 2013 03:24)

    Yes

  • #8

    Surinder Kathuria (Friday, 29 July 2011 01:43)

    Nice. Bless us also for such wonderful thoughts. dhannirankar jee

  • #7

    mukesh kumar , gurgaon (Friday, 15 July 2011 18:09)

    dhan nirankar ji

  • #6

    Tarlochan Singh Dhillon (Wednesday, 13 July 2011 17:22)

    Very great and wise thoughts Sewak Kumar Sahib Ji. Dhan Nirankar Ji.

  • #5

    Satish Sonwane, New Delhi (Tuesday, 12 July 2011 03:38)

    Rev Sewak ji...Dhan Nirnkar ji.
    Aapki har likhi hue bat sachhai ka bayan karati hai.
    Es aupacharikata ki duniya me das bhi esi tarah ke bhavo ko mahasus karata hai aur har tarah se prayas bhi karata hai ki naklipan ki jagah vastavikata ko rakhate hue jivan ko ji pau.
    Satguru aur aap jaise sant hame achhai ki rah dikhate rahe aur ham us par chal paye yahi prarthana.

  • #4

    samarpan abu dhabi,uae (Monday, 11 July 2011 10:25)

    dhan nirankar ji....very very nice information hai ji,,,aise information se hum sab milkar satguru ki kripa se pyar se society me change vi kar sakte hai..dhan nirankar ji..

  • #3

    Minakshi Batra (Monday, 11 July 2011 06:42)

    Bahut sunder bhav sarwan karne ka mokha mila, sach mein hi Ram Kumar Sewek ji ne ajj jo samaj mein ho raha hain us ka chitran kara hain, Dassi bhi aksar is bhed-bhav ko samaj nahi pati ki agar amir ne amir ko hi spot karna hain to phir yeh garib ko invite karne ki jarorat kya hain. Dassi ne amir garib ka bhav is liye rakha hain ki ashirwad to garib bhi deta hain to phir ashirwad ko maya se kyu tolla jaye. SACH MEIN YEH BAAT BAHUT HI SUNDER HAIN. THANX TO RAM KUMAR SEWEK JI. DNG.SNEHA ABOHAR (PUNJAB)

  • #2

    Chayan Kapoor, Faridabad, haryana (Monday, 11 July 2011 06:41)

    dhan nirankar ji, thanks santo

  • #1

    pritam singh, pandav nagar, delhi (Monday, 11 July 2011 06:40)

    DHAN NIRANKAR JI, bahut achha lekh hai mahatma ji.